4. Amaiera zoriontsuak

Amaiera zoriontsuak

Margaret Atwood

John-ek eta Mary-k elkar ezagutu dute.

Zer gertatuko da ondoren?

Amaiera zoriontsua izatea nahi baduzu, jo ezazu A-ra.

A.

John eta Mary maitemindu eta ezkontzen dira. Biek dituzte lan baliagarriak eta ongi ordainduak, eta bientzat kitzikagarriak eta bizigarriak dira. Etxe zoragarria erosten dute. Higiezinen prezioak gora egiten du. Geroago, haurtzaina pagatzeko moduan daudenean, bi ume dauzkate, biziki maite dituztenak. Umeak zintzoak dira. Johnek eta Maryk sexu kitzikagarria eta bizigarria dute, eta lagun baliagarriak. Elkarrekin joaten dira oporretara. Bikoteak erretiroa hartzen du. Biek zaletasun kitzikagarriak eta bizigarriak dituzte. Azkenean, hiltzen dira. Hala amaitzen da istorioa.

B.

Mary Johnekin maitemintzen da, baina John, aldiz, ez da Maryrekin maitemintzen. Johnek bere plazererako erabiltzen du Maryren gorputza, baita bere egoa asetzeko ere, gehiegi axola gabe. Maryren apartamentura joaten da astean bitan, eta Maryk afaria prestatzen dio. Ohartuko zarenez, harentzat emakumeak ez du balio kanpoan afaltzeak adina. Afaldu ondoren, Johnek txortan egiten dio eta lokartzen da Maryk harrikoa egiten duen bitartean, gizonak pentsa ez dezan emakume garbia ez dela, plater zikin horiek guztiak hor edukita. Maryk ezpainak margotzen ditu, itxura ona izateko hura esnatzen denean. Baina esnatzean, John ohartu ere ez da egiten, eta galtzerdiak, galtzontziloak, prakak, atorra eta gorbata janzten ditu, erantzi zituen kontrako ordenan. Berak ez ditu Maryren jantziak eranzten, Maryk berak eranzten ditu, eta, halaber, izugarrizko gogoa izatearen itxurak egiten ditu aldiro, ez sexua maite duelako, ez baitu maite, baina nahi du Johnek pentsatzea maite duela, zeren maiz samar egiten badute, hura ohitu eginen da, emakumeari lotuta geldituko da eta biak ezkonduko dira. Baina Johnek alde egiten du ia gabon esan gabe, eta handik hiru egunera itzultzen da seietarako eta dena hasten da berriz.

Mary jota gelditzen da. Negar egitea txarra da aurpegirako, denek dakite hori, baita Maryk ere, baina ezin dio eutsi. Lanean ohartzen dira. Lagunek esaten diote John zerri bat dela, arratoi bat, zakur bat, ez dela hark merezi duena, baina Maryk ezin du sinetsi. Johnen barnean, pentsatzen du, beste John bat dago, askoz atseginagoa den bat. Beste John hori aterako da, tximeleta bat kuskutik bezala, panpina malgukiduna sorpresa-kutxatik bezala, hezurra aranpasatik bezala, lehenbiziko John hori behar bezainbeste zukutuz gero.

Gau batean John janariaz kexatzen da. Ez da sekula kexatu janariaz. Mary minduta dago.

Bere lagunek esaten diote Madge izeneko beste emakume batekin ikusi dutela John jatetxe batean. Baina Madge ez da Mary gaitzitzen duena, jatetxea baizik. John ez da inoiz jatetxe batera joan Maryrekin. Maryk eskura dituen pilula lo-eragile eta aspirina guztiak bildu eta botila erdi jerez-ardorekin hartzen ditu. Jakin daiteke zer emakume klase den ikusita whiskia ere ez duela hartu. Ohar bat uzten dio Johni. Espero du hark aurkitzea eta ospitalera garaiz eramatea eta damutzea eta gero biak ezkontzea, baina halakorik ez da gertatzen, eta Mary hil egiten da.

John Madgerekin ezkontzen da, eta denak An bezala segitzen du.

C.

John, zein gizon zaharra baita, Maryrekin maitemintzen da, eta Mary, zeinek 22 urte besterik ez baititu, errukitzen da hura kezkaturik dagoelako ilea galtzearekin. Mary harekin oheratzen da, nahiz eta maitemindurik ez egon. Lanean ezagutu zuen. Mary James izeneko batekin dago maitemindurik, zeinek ere 22 urte baititu, baina ez dago prest harreman luzerik izateko.

Johnek, ordea, aspaldian dauka harreman luze bat: horixe du kezka. Johnek lanpostu errespetagarri eta egonkorra du, eta gora egiten ari da, baina horrek ez dio Maryri zirrararik eragiten; Jamesek bai, ordea, motorra duelako, eta diskoen bilduma zoragarri bat. Baina James kanpoan dago maiz motorrarekin, libre izaten. Nola libertatea ez den gauza bera neskentzat, bitartean, Maryk ostegun gauak Johnekin ematen ditu. Johnek ostegunetan baino ezin du ihesik egin. John Madge izeneko emakume batekin dago ezkonduta, eta bi seme-alaba dituzte. Etxe zoragarri bat ere badute, biek erosia justu higiezinen prezioek gora egin baino lehen, baita bientzat kitzikagarriak eta bizigarriak diren zaletasunak ere, astia dutenean egiten dituztenak. Johnek esaten dionez, Maryk garrantzi handia du harentzat, baina jakina, emaztea ezin du utzi, hitza hitz delako. John kontu horrekin behar baino luzeago aritzen da eta Maryrentzat aspergarria da, baina gizon zaharrek gehiago irauten dute, eta, beraz, nahiko denbora ona pasatzen du harekin.

Egun batean, haizeak ekarrita-edo, James agertzen da motorraren gainean, Kaliforniako marihuana primerakoarekin. Posible dela uste duzun baino flipatuagorik bukatzen dute Jamesek eta Maryk eta elkarrekin joaten dira ohera. Dena lauso-lauso bihurtzen da, baina orduan John ailegatzen da, Maryren apartamentuko giltza duelako. Drogaturik eta elkarri loturik aurkitzen ditu. Nekez senti daiteke jeloskor, Madge kontuan hartzen bada, baina, hala ere, etsipenak jota sentitzen da. Azken batean, bizitza erdia egina du, bi urtean arrautza bezain soila egonen da eta ezin dio denari eutsi. Pistola bat erosten du, esanez tiro-praktikak egiteko behar duela –hori bilbearen puntu ahula da, baina geroago moldatu daiteke– eta biei egiten die tiro, eta ondoren bere buruari.

Madge, doluz aldi egoki batean egon ondoren, Fred izeneko gizon ulerkor batekin ezkontzen da, eta denak An bezala segitzen du, baina izen desberdinekin.

D.

Fredek eta Madgek ez dute arazorik. Ohiz kanpoko harreman ona dute eta sortzen diren zailtasun txiki horiek konpontzen dituzte. Baina haien etxe zoragarria itsasertzean dago, eta, halako batean, olatu erraldoi batek jotzen du. Higiezinen prezioek behera egiten dute. Istorioaren gainerakoan kontatzen da zerk eragin zuen olatu erraldoia eta nola egin zuten ihes Fredek eta Madgek. Haiek lortzen dute, baina milaka itotzen dira. Fred eta Madge, hala ere, bihotz eta esker onekoak dira, eta An bezala segitzen du denak.

E.

Bai, baina Fredek gaizki du bihotza. Istorioaren gainerakoan kontatzen da zein atsegin eta ulerkor jokatzen duten biek Fred hiltzen den arte. Orduan, Madgek karitateari ekiten dio A bukatu arte. Nahi izanez gero, “Madge”, “minbizia", “errudun eta nahasi” eta “hegazti-behaketa” jar daiteke.

F.

Uste baduzu hau guztia sobera burgesa dela, John iraultzaile bat izan dadila, eta Mary kontraespioitzaren agente bat, eta ikusiko dugu noraino ailegatzen zaren. Gogoan izan hau Kanada dela. Hala ere, An bukatuko duzu, nahiz eta saga lizuntsua eta pasioz betea lortzen duzun tartean, edo gure garaiko kronika bat-edo. Onartu beharra duzu, bukaera berdina da, edozein dela ere zatiak egiteko modua. Ez zaitzatela beste bukaera batzuek liluratu, faltsuak dira guztiak, dela nahita direlako halakoak, iruzurra egiteko asmo gaiztoarekin prestatuak, dela gehiegizko baikortasunarekin sortuak direlako, ez bada sentimentalkeria hutsarekin.

Hona hemen egiazko bukaera bakarra:

John eta Mary hiltzen dira. John eta Mary hiltzen dira. John eta Mary hiltzen dira.

Horixe bukaerez esan beharrekoa. Hasierak dibertigarriagoak dira beti. Dena dela, jakina da benetako adituek erdikoa hobesten dutela, lantzen zailena baita.

Horra hor zer diren bilbeak, gauza bat beste baten ondoren, besterik ez: zer, zer eta zer.

Orain, erabil itzazu Nola eta Zergatik.