Herri zahar-zaharra
H. P. Lovecraft |
|
Melmoth maitea:
Lan eta lan ibili zara
Varius Avitus Bassianus asiar gazte jasanezin horren iragan illunean zer edo
zer aurkitu nahian, ezta? Buf! Gutxi dira Siriako astakirten hori baino
gehiago gorrotatzen ditudanak!
Ni neu ere
erromatarren garaietara eraman nau James Rhoades-en Eneida irakurtzeak. Ez
nuen lehenago ezagutzen eta iruditzen zait fidelagoa dela P. Maro-rekiko
ikusi ditudan bertsozko beste bertsioak baino, nire osaba Clark doktore
zenarena barne, zein ez baitzen argitara eman. Virgilioren libertimendu
horrek, Santu Guztien bezperak berezko dituen pentsamendu espektralekin
batera, non akelarreko sorginak mendietan barna agertzen baitira, erromatar
amets bat eragin zidan joan den astelehen gauean, horren argia eta bizia izan
zena, ezkututako ikararen halako irudi titanikoak zituena, ezen zinez
pentsatzen baitut liburu batean erabiliko dudala. Erromatar ametsak ez ziren
ezohikoak gaztea nintzelarik –Julio jainkotarraren atzetik ibiltzen nintzen
Galia guztian zehar tribuno militar gisa– baina horren aspaldian desagertu
zirenez, oraingo honek jota uzti nau indar ikaragarriz.
|
2018(e)ko maiatzaren 18(a), ostirala
15. Herri zahar-zaharra
Harpidetu honetara:
Mezuak (Atom)